Boson de Provence

Cél articllo est ècrit en arpetan supradialèctâl / ORB lârge.

Lo rê Boson et sant Ètièno, bocon de les frèsques de l’abayie Sant-Fortunâ de Charluè, XII^émo siècllo.

Boson de Provence ou ben Boson V de Provence — des côps dét asse-ben Boson V de Vièna ou d’Ârlo — (nèssu v. 844 a Vièna et môrt lo 11 de janviér 887 en la méma vela) est un monarco lotaringien, qu’est lo rê de Bâssa-Borgogne (Provence) u IX^émo siècllo, et pués na granta pèrsonalitât de l’histouère arpetana.

Il est lo premiér a arrevar a emposar na reyôtât èlèctiva, ôtonoma et endèpendenta, ben que fragila, u méten de l’imperium francorum du IX^émo siècllo.

Biografia

Boson est nèssu vers 844 a Vièna, vela burgonda dedens la valâ du Rôno. Son pâre est Bevin de Vièna, qu’est més cognu desot lo nom de Bevin de Gôrze. Mârie en 876 Èrmengârda (852 / 855 – † 896), felye a l’emperor Louis II lo Joueno (825 – † 875).

En 871, vint duc du Liyonês et du Viènês en Bâssa-Borgogne.

En 872, il est nomâ conseliér u rê d’Aquitania.

En 875, vint duc en Étalia, et pués duc de Provence.

En 877, vint comto de Mâcon et de Châlon, pués, en 879, étot d’Ôtun.

Il est lo sègnor de l’abayie de Sent-Môris d’Agôno, qu’at fondâ l’abayie Sant-Fortunât de Charluè.

Lo 15 d’octobro 879, prèlats et sègnors sè rassemblont en concilo u châtél de Mantalye (entre-mié Anêron et Châtélnôf-de-Goualôro) por chouèsir l’homo lo més capâblo a emparar l’Égllése et lo payis. Chouèséssont Boson coment rê et pués pregnont sus lor la rèstoracion du reyômo de Borgogne, constituâ de les possèssions a Boson, mas asse-ben des diocèsos ux religiox – siéx arcevècos et diéx-sèpt èvècos – presents (Èx, Ârlo, Ôtun, Avignon, Biôna, Besençon, Châlon, Dijon, Geneva, Grenoblo, Lengres, Losena, Liyon, Mâcon, Marselye, Tarentèsa, Tornuèrro, Troyes, Valence, Vièna).

Boson môrt a Vièna (Isera) lo 11 de janviér 887. Il est entèrrâ dedens la catèdrâla Sant-Môris de Vièna.

Enfants

• Guila de Provence, felye a Boson et Èrmengârda, est la fèna a Rodolfo I^ér de Borgogne, († 911) pués d’Hugo d’Ârlo (vers 882 – † 947).
• Engèlbèrga (? – † ?).
• Louis III l’Avogllo (vers 880 – † aprés 928), rê de Provence (887 – 928), rê d’Étalia (900) et pués emperor du Cuchient (901 – 905).

Bibliografia

• (fr) René Poupardin, « Boson et le royaume de Provence (855-933 ?) », Châlon, 1899.
• (de) Fritz Seemann, « Boso von Niederburgund », Halle, 1911.
• (fr) R.-H. Bautier, « Aux origines du royaume de Provence. De la sédition avortée de Boson à la royauté légitime de Louis », dedens Provence historique, fasc. XCIII-XCIV, 1973, p. 41-68.
• (fr) Franz Staab, « Jugement moral et propagande : Boson de Vienne vu par les élites du royaume de l’Est », dedens Régine Le Jan, « La royauté et les élites dans l’Europa carolingienne (du début du IXe siècle aux environs de 920) », 1998, p. 365–382.