Vouiquipèdia:Lumiére dessus…/Ucrèna
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo devendro 04 de novembro 2022 tant qu’u demécro 09 de novembro 2022.
L’Ucrèna [y.ˈkre.na] (Україна, Ukrajina [ʊ.krɐ.ˈji.nɐ] en ucrènien) est un Ètat d’Eropa levantenche, lo second d’Eropa per sa supèrficie et lo premiér tot eropèen. El est bordâye per la mar Nêre et la mar d’Azov u mié-jorn, frontaliére avouéc la Russia u nord-èste et u levant, avouéc la Bièlorussia a bise, avouéc la Pologne a l’ouèste-nord-ouèste, avouéc la Slovaquia et les Hongries u cuchient et pués avouéc la Roumania et la Mordavia u sud-ouèste. La capitâla, et la vela la ples poplâye du payis, est Kyiv.
Les origines de la cultura ucrènièna remontont a l’Ètat slâvo levantenc mèdièvâl de la Rus’ de Kyiv. Aprés la chêta de cela dèrriére per les envâsions mongoles du XIIIémo siècllo, lo tèrritouèro fât la chousa de particions et sè vêt revendicâ per un mouél de pouessiences ètrangiéres, que la rèpublica de les Doves Nacions u cuchient et l’Empiro otoman u mié-jorn. L’Hètmanat cosaco endèpendent ègziste entre-mié lo XVIIémo siècllo et lo XVIIIémo siècllo, devant que ses parties levantenche et centrâla seyont pas fêtes rentrar dedens l’Empiro russo. L’Ucrèna cuchientenche serat, de son fllanc, fêta rentrar dedens l’empiro d’Ôtriche, son succèssor l’Ôtriche-Hongries, pués la Seconda Rèpublica de Pologne.