Vouiquipèdia:Lumiére dessus…/Liyon
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demécro 04 d’oût 2021 tant qu’u demârs 10 d’oût 2021.
Liyon [li.ˈjõ] (Lyon [ljɔ̃] ou ben [li.ɔ̃] Acutar en francês) est na comuna francêse et arpitana, que sè trôve dens lo quârt sud-èste de la France, u confolent du Rôno et de la Sona. Sièjo du consèly de la mètropola de Liyon, que son statut particuliér lyé balye a la vês les atribucions d’una mètropola et d’un dèpartament, el’est étot lo ch·èf-luè de l’arrondissement de Liyon, celi de la circonscripcion dèpartamentâla du Rôno et celi de la règ·ion Ôvèrgne-Rôno-Ârpes, et pués la vielye capitâla du Liyonês.
La comuna at na situacion de trêvo g·eografico du payis, a bise du colidor naturâl du Rôno que côrt depués Liyon jusqu’a Marselye. Placiê entre-mié lo Massis centrâl u sêr et lo massis arpenc u matin, la vila de Liyon ocupe na posicion stratègica dedens la circulacion bise-mié-jorn en Eropa. Vielye capitâla de les Gôles du temps de l’Empiro romen, el’est lo sièjo d’un arcevèchiê que lo titulèro pôrte lo titro de primat de les Gôles. Liyon vint na vila bien comèrçanta et un endrêt financiér de pèrmiér ôrdre a la Renèssence. Sa prospèritât èconomica est étâ portâ yena aprés l’ôtra per la sèya, pués per l’aparicion de les endustries notament dus linjos, ch·imiques et, més dèrriérement, per l’endustria de l’émâge.
Los habitents de la vila sont apelâs los Liyonês [lu li.jɔ.ˈnɛ] et les Liyonêses [le li.jɔ.ˈneː.zə].