Vouiquipèdia:Lumiére dessus…/Forésien
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês la demenge 1ér de dècembro 2024 tant qu’u dessando 7 de dècembro 2024.
Lo forésien [fɔ.ʀi.ˈzjɛ̃, fu.ʀi.ˈzjɔ̃, fɔ.ʀi.ˈzjẽ] — diont pletout lo forénâs [fu.ri.ˈna, fu.ri.ˈnɒ] dens los patouès de les montagnes du Sêr — est un ensems de dialèctos prod morselâs de la lengoua arpitana parlâ dens lo Forês, surtot lo dèpartament de Lêre, pués doux-três comunes dens los dèpartaments vesins du Pué-de-Doma, d’Aliér et de Sona-et-Lêre.
Y at quatro grandes zones de locucion du forésien :
- Les montagnes du Sêr, lo veré forénâs, règion ont il s’est lo mielx consèrvâ. O est dedens quela règion que sè trôvont los dèrriérs locutors et que la lengoua forésièna est uncor praticâ, diu a l’isolament et pués un braçâjo de populacion muendro.
- La plana du Forês, lo gagâs âssé, avouéc una lengoua petafinâ, francèyêe (populacion muens stâbla, prod de fèrmiérs, apôrt de la montagne...). La lengoua y est étâ pèrdua diu a l’endustria et u braçâjo de les populacions.
- Les montagnes du Madin avouéc una lengoua marcâ per lo liyonês.
- Lo Rouanês uvèrt vers la bise, lo rouanârd, avouéc doux ensems de patouès considèrâblament difèrents : lo patouès du bôrd drêt de Lêre marcâ per la lengoua d’oly (borguegnon et francês) et lo biôjolês et pués lo patouès du bôrd gôcho de Lêre qu’est marcâ ren que per la lengoua d’oly.