Vouiquipèdia:Lumiére dessus…/Tasson
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo devendro 18 de mârs 2022 tant qu’u demârs 22 de mârs 2022.
Lo tasson pôrte lo nom scientifico Meles meles. Diont asse-ben lo chin-tasson, lo chin-tês ou ben lo tês-chin dens les montagnes du sêr du Forês, lo blèrô en doux-três endrêts du Liyonês, na granta partia du Biôjolês, du Rouanês levantenc, du Jarês et de la Comtât arpetana et pués lo blèrél a Sant-Etiève. O est la seconda més grôssa èspèce de Mustèlidos d’Eropa aprés lo golu Gulo gulo. Trapu et bassèt, pôt avengiér 70 cm de long (90 cm avouéc la cova, que mesere a pou prés 20 cm), por 25 a 30 cm u garrot et tant qu’a na vengtêna de kilogramos (12 kg en moyena).
Meles meles at 34 dents. Des côps, presente un mâltru petit-martél dèrriér les dents-de-l’uely.
Il est brâvament recognessâblo per les bendes longitudinâles nêres que pôrte dessus son morro blanc. Cél tasson vit possiblament dens quâsi tota l’Eropa et pués na granta partia de la bise de l’Asia centrâla et de Bise, u mié-jorn du cèrcllo polèro (tant qu’a 2 000 m de hiôt en France).