Vouiquipèdia:Lumiére dessus…/Chamôni

Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo dessando 06 de novembro 2021 tant qu’u devendro 12 de novembro 2021.

---

Lo plâtro Sôçura a Chamôni.

Chamôni [θa.mu.ˈni, θam.ˈni] (Chamonix-Mont-Blanc [ʃa.mɔ.ni.mɔ̃.blɑ̃] en francês) est unna comona francêsa et arpetanna de montagne du Hiôt-Fôcegni en Savouè, que sè trôve dens lo dèpartamuent de la Savouè-d’Amont en règion Ârvèrgne-Rôno-Ârpes.

Chamôni entre dens l’histouère en 1091, quand lo comto Èmon I^ér de Geneva fât dotacion de la valê a l’abayie Sant-Mechiél-de-la-Cllusa, en Piemont. De mouénos s’enstâlont sus la riva drêta d’Ârva. O est la nèssence du priorât de Chamôni. La comona z-est un tèrritouèro du duchiê de Savouè qu’est dens los Ètats de Savouè, lyors-mémos fêts rentrar aprés côp u reyômo de Sardègne. Pués-cen desot la Rèvolucion francêsa et lo Prumiér Empiro, vint un tèrritouèro francês. Lo 24 de mârs 1860, per lo trètâ de Turin, lo duchiê de Savouè z-est cèdâ a la France. Lo 4 d’avril 1860, la comona de Chamôni vint adonc por de bon francêsa. Prend lo nom oficièlo de Chamonix-Mont-Blanc en francês lo 21 de novembro 1921.

Los habitents de la velèta ant nom los Chamoniârds [lu θa.mɔ.ˈɲɑːʀ] et les Chamoniârdes [le θa.mɔ.ˈɲɑːʀ.de].

Liére la suita