Vouiquipèdia:Lumiére dessus…/Tê sârvâjo
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demârs 9 d’avril 2024 tant qu’u devendro 12 d’avril 2024.
Lo tê sârvâjo [te sar.ˈvaː.dzo], lo mile-pèrtués [mil.par.ˈtɥi], lo trochèran [trɔ.tse.ˈrã] ou ben lo tê [te] (Hypericum perforatum L., 1753) est na planta folyèrua pèrèna de la famelye de les Cllusiacês d’aprés lo cllassement cllassico (ou ben de les Hipèricacês d’aprés lo cllassement filogènètico).
Les fates sècrètrices cllâres presentes dessus lo limbo de les fôlyes alongiêes balyont l’êr d’un mouél de pèrforacions, particularitât a l’origina des noms arpetans de mile-pèrtués que vôt dére mile golèts, et pués de cent-pèrtués que vôt dére cent golèts.
Per-dedens totes les èspèces de mile-pèrtués que fôrmont lo genro Hypericum, l’apelacion sen èpitèto de mile-pèrtués dèsigne gènèralament lo tê sârvâjo dens un mouél de patouès arpetans.