Vouiquipèdia:Lumiére dessus…/Sant-Etiève
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demârs 07 de dècembro 2021 tant qu’u delon 13 de dècembro 2021.
Sant-Etiève [sã ˈtʃjeː.və] (Saint-Étienne [sɛ̃.t‿e.tjɛn] en francês) est una comuna francêsa et arpitana du Jarês dedins lo Forês historico, que sè trôve dins lo quârt sud-èste de la France, en règion Ôvèrgne-Rôno-Ârpes. V-o est lo chèf-luè du dèpartament de vers Lêre et lo sièjo de la mètropola èstèfanouèsa.
Avouéc 174 082 habitants en 2020, el est la 14éma comuna la ples poplâ de France (2016) et la 2nda comuna d’Ôvèrgne-Rôno-Ârpes. Sant-Etiève Mètropola constitue per sa populacion (400 813 habitants en 2020) la 3éma mètropola règionâla aprés la mètropola de vers Grenoblo-Ârpes et la mètropola de vers Liyon. La comuna est âssé u bél mié d’un vâsto sôl urben de més de 520 640 habitants en 2017, la diéx-sèptiéma de France per sa populacion, que rassemble 117 comunes.
Los habitants de la viala s’apèlont los Gagâs [lu ɡa.ˈɡa] et les Gagâsses [le ɡa.ˈɡaːs] ou los Èstèfanouès [lu.z‿es.te.fa.ˈnwɛ] et les Èstèfanouèses [le.z‿es.te.fa.ˈnwɛːz].