Vouiquipèdia:Lumiére dessus…/Lengoua d’oly
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo dejô 25 de fevriér 2021 tant qu’u delon 1ér de mârs 2021.
Historicament, la lengoua d’oly, ou tot simplament oly (oïl en francês ; prononciacion francêsa : o-il [ɔ.il], ou-il [u.il], oui [wi], o-ille [ɔj]), est la lengoua romana que s’est dèvelopâye dedens la partia bise de la Gôla, pués dedens la partia bise de la France, dedens lo mié-jorn de la Bèlg·ica (Bèlg·ica romana) et dedens les iles Angllo-Normandes, et pués qu’ére prègiêe u Moyen Âjo. Cél groupo de bise at consèrvâ un substrat cèltico més important et pués at endurâ na més granta portâ du gèrmanico que ses suères occitano-romana du mié-jorn, la lengoua d’oc, et galo-romana du sud-èste, la lengoua d’ouè, que sont lo fruit d’una romanisacion més provonda de l’èspâço mèditèrranèen por des rêsons liyêes ux èchanjos èconomicos, a l’enstalacion de colons romens dedens lo sud-èste et a côsa de sa més granta proximitât g·eografica avouéc lo cârro d’origina du latin.
La lengoua d’oly est pariére a cen qu’apèlont lo viely francês et pués engllobe sos difèrents dialèctos. Dês la fin du Moyen Âjo, lo moyen francês nen èmèye et pués èvolue en francês d’ora, nan pas los ôtros parlars d’oly que réstont du payis et seront la sôrsa des patouès locâls. L’ensemblo de celos parlars pôt étre considèrâ coment un groupo de les lengoues galo-romanes.