Vouiquipèdia:Lumiére dessus…/Larmuise
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo dejô 15 de julyèt 2021 tant qu’u delon 19 de julyèt 2021.
La larmuise ou ben lo lenzèrd gris (Podarcis muralis) est n’èspèce de Lacertilia de la famelye des Lacertidae. Cél petiôt lenzèrd vint d’Eropa continentâla, més justament de les règ·ions étaliènes et balcaniques. Il est larjament present dedens tôs los payis d’Eropa mèditèrranèèna ou ben vesins, mas pas dessus les iles de Mèditèrranê. Il est étâ fêt rentrar en Amèrica de Bise et pués en Anglletèrra.
Lo nom de genro Podarcis vint du grèco ποδάρχις et signifie « ux pieds lèstos », et pués lo nom d’èspèce vint du latin mūrālis que vôt dére « du rampârt, de les muralyes ». Lo nom angllès est Common Wall Lizard (« lenzèrd comon de la muralye »). En èspagnol s’apèle Lagartija roquera, en catalan Sargantana roquera (ou ben « petiôt lenzèrd de roche »), en étalien Lucertola muraiola et en alemand Mauereidechsen (« lenzèrd de les muralyes »). En Sèrbia (yona de ses tèrres natâles avouéc l’Étalia de Bise), l’apèlont Zidni gušter, et son nom polonès est Jaszczurka murowa (perce que nen rencontront avouéc des côps dedens lo fin mié-jorn de la Pologne).
Il est étot cognu coment la gremelyèta en vôdouès, la lenzeniére en doux-três patouès savoyârds et pués lo lezèrd gris en vâldoten.