Vouiquipèdia:Lumiére dessus…/Coalâ
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demécro 30 de jouin 2021 tant qu’a la demenge 04 de julyèt 2021.
Lo coalâ (Phascolarctos cinereus), apelâ étot lo pèrèsox ôstralien, est n’èspèce de marsupiâl arboricolo hèrbivôro endèmico d’Ôstralia et pués lo solèt reprèsentent adés vif de la famelye des fascolartidès. Lo trôvont dedens les règ·ions coutiéres de l’Ôstralia-Miéjornâla et levantenche, dês Adelayida tant qu’a la partia mié-jorn de la pèninsula du chavon Yorque. Les populacions s’èpatont asse-ben dessus de grôsses distances dedens l’arriér-payis ôstralien (outback), yô que l’humiditât fât prod por lo mantin de bouescs. Los coalâs d’Ôstralia-Miéjornâla furont èxtèrminâs u comencement du XXémo siècllo, mas cél Ètat fèdèrâ est dês adonc étâ repoplâ grâce a de transfèrts du Victoria. Cela bétye ére pas més present ni en Tasmania, ni en Ôstralia-Cuchientenche, mas y est étâ renfatâ.
Lo coalâ est ètrêtament liyê a l’ucalipto ou ben lo gomiér, que mege ren que les fôlyes de doux-três èspèces. Los mâcllos pôvont vivre en moyena 15 ans, et les femèles 20 ans.