Micèlion

De Vouiquipèdia, l’enciclopèdia abada.
Aller à la navigation Aller à la recherche
B down.svg Cél articllo est ècrit en arpetan supradialèctâl / ORB lârge. Lo blâson panarpetan


Micèlion de pluroto en huitra (Pleurotus ostreatus) curtivâ dessus de mârc de câfè.

Lo micèlion, apelâ dens lo lengâjo corent blanc de champegnon (rèference a la color du fetrâjo qu’obsèrvont per ègzemplo dedens l’ètèrsa forètiére)[1], est l’aparèly vèg·ètatif des champegnons ou ben de quârques bactèries filamentoses coment les actinobactèries (Streptomyces, Mycobacterium...). G·ènèralament pou visiblo, il est composâ d’un ensemblo de fils, més ou muens ramifiâs, apelâs hifes, que trôvont dedens la tèrra ou ben lo substrat nutritif. Celes hifes sont formâyes de cèlules brâvament alongiêes et cllouèsenâyes, a la difèrence de celes dedens lo psudomicèlion sen cllouèsons verés (structura cènocitica (en)[V 1] constituâye de fils que fôrmont de sifons que contegnont na massa citoplâmica que los noyéls sont èparpelyês dedens)[2].

Lo micèlion vèg·ètatif desot tèrra balye un micèlion reproductor g·ènèralament drèciê èn l’êr, apelâ carpoforo, chargiê de la produccion et de la morèson de les spores que vegnont d’una reproduccion sèxuâye ou ben asèxuâye. Cen que diont bien champegnon est franc ren que cél sporofor, aparèly reproductor formâ per lo micèlion fèrtilo.

Sus la tèrra lo micèlion sè pôt veriér en fetrâjo, lo pôvont asse-ben vêre u pied de la chamba de doux-três champegnons. Chiéz quârques èspèces les hifes sont rassemblâyes en cordons sovent entourâs d’un cortèx, que balyont l’êr de racenes, et sont adonc apelâyes rizomorfos.

Ètimologia[changiér | changiér lo tèxto sôrsa]

Lo tèrmo micèlion vint du grèco ancian : μύκης (mukês, « champegnon »), de la consona « l » èpentètica et du sufixo nominâl « -ium »[3] (« -ion » en arpetan).

Biologia[changiér | changiér lo tèxto sôrsa]

Chiéz un mouél de champegnons lo micèlion primèro, qu’est haplôido, vint de la gèrnèson d’una spora. Sè vôt assemblar avouéc ’n ôtro micèlion primèro compatiblo d’un sèxo oposâ por balyér un micèlion secondèro tèoricament diplôido, quand ben, câs solèt chiéz los étres vivents, la fusion des noyéls sè tindrat ren que brâvament més târd, dens lo carpoforo (ou ben sporoforo, que corrèspond a cen que lo publico apèle corament champegnon), justo devant la formacion de les spores pendent la mèyosa.

Lo micèlion assure lo crêt vèg·ètatif (dedens lo substrat) du champegnon, lui pèrmèt étot de trère un mouél d’èssences nutritives variâyes a côsa des enzimos spècialament pouessients.

Chiéz un mouél d’èspèces (amanites, bolêts, chanterèles, ...), vôt formar d’orgânos comons avouéc les plantes u nivél de lors racenes : o est cen que diont les micorrizes, yona de les simbioses més importantes du mondo vivent.

Usâjos[changiér | changiér lo tèxto sôrsa]

Lo principâl usâjo du micèlion est la cultura de champegnons : fôt ensèmenciér a micèlion frès lo substrat por los curtivar.

Des sociètâts privâyes dens lo mondo entiér dèvelopont la produccion et la venta d’inoculents micorriziens dèstinâs a un usâjo agricolo (biofèrtilisient, biostimulent) mas asse-ben ècologico (revèg·ètalisacion de les tèrres rogiêes, fitoremèdiacion)[4].

Ux Payis-d’Avâl, la stilista Aniela Hoitink at fêt un prototipo de roba tot fêt de micèlion[5].

Notes et rèferences[changiér | changiér lo tèxto sôrsa]

Notes[changiér | changiér lo tèxto sôrsa]

Vocabulèro[changiér | changiér lo tèxto sôrsa]

  1. Du grèco ancian κοινος, cèno, « comon », κύτος, cito, « cèlula ».

Rèferences[changiér | changiér lo tèxto sôrsa]

  1. (fr) Jean-Christophe Guéguen, David Garon, Biodiversité et évolution du monde fongique, EDP Sciences (en legne), p. 49.
  2. (fr) Maurice Langeron, Précis de mycologie, Masson et Cie, p. 43.
  3. (fr) « MYCÉLIUM : Définition de MYCÉLIUM », dessus www.cnrtl.fr (viu lo 31 de dècembro 2020).
  4. (en) Gianinazzi G, Gollotte A, Binet M-N, Van Tuinen D, ReD WD, « Agroecology: the key role of arbuscular mycorrhizas in ecosystem services », Mycorrhiza, vol. 20, no 8,‎ novembro 2010, p. 519–530 (DOI 10.1007/s00572-010-0333-3).
  5. (fr) « Le champignon, LA star de demain ? | Le magazine de Prêt à Pousser », dessus pretapousser.fr (viu lo 30 de jouin 2016).