Mechiél Crox

De Vouiquipèdia, l’enciclopèdia abada.
B down.svg Cél articllo z-est ècrit en arpetan savoyârd / ORB lârge. Le blâson du duchiê de Savouè


Mechiél Crox.

Mechiél Ôgusto Crox (en francês Michel Auguste Croz; Chamôni, 22 d’avril 1830 - Grant-Bèca, 14 de j·ulyèt 1865) ére un arpinisto arpetan et guido de montagne.

Guido d'hôta montagne famox, il at acompagnê de nombrox pioniérs de l'arpinismo angllês entre 1859 et 1865, participant a de nombroses premiéres èlèvacions, que lo Mont Viso, lo Mont Dolent et la Grant-Bèca: pendent ceta dèrriére entreprêsa, il est môrt per accident.

Activitâts coment guido de montagne[changiér | changiér lo tèxto sôrsa]

Nèssu u Tôrn, un velâr de Chamôni, Crox at comenciê a travalyér coment guido d'hôta montagne en 1859, quand il at étâ engagiê per William Mathews (fondator du Clube arpenc angllês) por n'èlèvacion du Mont-Bllanc.[1] Il at acompagnê justo aprés, avouéc son frâre Jean-Baptiste Crox, los frâres Mathew d'ètot dens les doves campagnes successives de 1860 et 1861, qu'ant culminâ avouéc la premiére èlèvacion du Mont Vésol. Aprés cen, il rejuend coment guido d'ôtros arpinistos du calibro de Francis Fox Tuckett et Edward Whymper, rèalisant, outre de nombroses premiéres èlèvacions (permié qu'on pôt citar, outre lo Mont Vésol précité, lo Grant Damâjo, la Bârra des Ècrins et l'Agouelye d'Argentiére), que plusiors premiéres travèrsâs de colenes tant qu'alor vièrges, coment lo Col des Ècrins, lo Col du Sélé et lo Col du Gllaciér Blanc dens lo Massif des Ècrins (1862, avouéc Tuckett, Peter Perren et Bartolomeo Peyrotte).

Grant-Bèca[changiér | changiér lo tèxto sôrsa]

Gustavo Doré : Môrt des arpinistos a fllanc de la Grant-Bèca, lo 14 de j·ulyèt 1865.

En 1865, Mechiél Crox rejuend l'èxpèdicion menâye per Edward Whymper que tente la premiére èlèvacion de la Grant-Bèca dês la Crèta de l'Hörnli. L'èxpèdicion compregnêt, outre Crox et Whymper, Charles Hudson, Lord Francis Douglas, Douglas Robert Hadow, et les doves guides de Prât-Borgno Peter Taugwalder pâre et fils. L'èxpèdicion at reussi a avengiér lo sonjon lo 14 de julyèt 1865. U retôrn, Hadow, second de la cordâye, colate, borre Crox qu'est en téta, l'entrêne tot du long de la face nord en surplomb de la Grant-Bèca ; los doux ant entrênâ asse-ben dens lor chête Lord Douglas et Hudson avouéc, pués la côrda qu'unéssêt les sèpt s'est rontua tandis que Whymper et les doves Taugwalder ant reussi a s'acrochiér ux roches. Lo côrp de Mechiél Crox, retrovâ quârques jorns més târd, est entèrrâ u cemetiéro de l'égllése de Prât-Borgno.

Premiéres èlèvacions[changiér | changiér lo tèxto sôrsa]

Il at fêt la premiére èlèvacion des montagnes que siuvont:

Comèmoracions[changiér | changiér lo tèxto sôrsa]

Monument de tomba a Prât-Borgno.

Yon des sonjons des Grantes Jorasses est dèdiê a Mechiél Crox: La Pouenta Crox (4 110 m).

Sa vela natâla, Chamôni, lui at dèdiê na charriére centrâla, lo Cors Mechiél Crox (en francês Avenue Michel Croz). Yon des més ancians bâtiments de Chamôni, la Sâla Mechiél Crox, que lui ére dèdiêe, at étâ dètruita per un fuè lo 15 de fevriér 1999.

La tomba de Mechiél Ôgusto Crox sè trôve pués a Prât-Borgno.

Bibliografia[changiér | changiér lo tèxto sôrsa]

  • Marcel Pérès, « La cordée royale. Edouard Whymper et Michel Croz, le prince des guides », Chamôni 2011.

Lims de defôr[changiér | changiér lo tèxto sôrsa]

Lo logô de Commons
Wikimedia Commons propôse de documents multimèdiâ sus Mechiél Crox.


Notes[changiér | changiér lo tèxto sôrsa]

  1. W. A. B. Coolidge, « Un Pionnier des Alpes Françaises : William Mathews », dedens : Revue Alpine, 1904, tome 10, numéro 2, p. 42-51.