Lê Gombèta

Lê des Burgondos, Lex Burgundionum

Cél articllo est ècrit en arpetan supradialèctâl / ORB lârge.

Manuscrit du Breviéro d’Alaric consèrvâ a l’univèrsitât de Cllârmont-Fèrrand, X^émo siècllo.

La lê Gombèta ou ben lê des Burgondos (lex Burgundionum en latin) est un code de lês civiles et pènâles procllamâ u comencement du VI^émo siècllo per lo rê des Burgondos Gondobâd, pués apondu per sos succèssors Sigismond et Godomar III, que fixe los usâjos a rèspèctar per los sujèts burgondos du Reyômo. El at por complèment la « lê romèna des Burgondos » (lex romana Burgundionum) que regârde los sujèts « romens » du Reyômo, cen vôt dére les gens galo-romènes du payis.

De bôna hora, la lex Burgundionum est étâye més ben apelâye du nom de son procllamior lex Gundobada (« lê de Gondobâd »), pués lex Gumbata, cen qu’at balyê en arpetan « lê Gombèta ».

O est lo premiér recuély de lês d’un rê gèrmanico en Gôla (la règ·ion de l’Arpetania a vegnir avouéc) ; aprés lui sont parus los codes que regârdont los Vesigots, pués celos que regârdont los Francos. Gins de code montre mielx la fusion de la partia romèna avouéc la partia gèrmanica.

Bibliografia

• (fr) « Loi Gombette » sus lo Dictionnaire historique de la Suisse en legne.
• (fr) J.-F.-A. Peyré, « Lois des Bourguignons, vulgairement loi Gombette », Liyon, 1855.
• (la) Ludwig Rudolf von Salis (èd.), « Leges Burgundionum », dedens Monumenta Germaniae Historica, Leges, Leges nationum Germanicarum (LL nat. Germ.), 2, 1, Hannover, 1892.
• (de) Franz Beyerle (èd.), « Gesetze der Burgunden », Weimar, 1936.