Aller au contenu

Darbelin de Chalendes

De Vouiquipèdia, l’enciclopèdia abada.

Darbelin de Noèl

Cél articllo est ècrit en arpetan supradialèctâl / ORB lârge. Lo blâson panarpetan


Doux-três darbelins de Chalendes plantos devant lo téâtro de Chambèri de nuet.

Lo darbelin de Chalendes [dar.bə.ˈlĩ də tsa.ˈlɛ̃.də][1] ou ben lo darbelin de Noèl [dar.bə.ˈlĩ də no.ˈe] est un âbro dècorâ, bien de côps un darbél a fôlyes pèrsistentes (sapin, pèce ou souefe) ou ben un âbro artificièl d’aparence pariére, associyê a la cèlèbracion de Chalendes.

La môda du darbelin de Chalendes coment nos la cognessens aparêt probâblament a la fin du Moyen Âjo dedens los payis de cultura gèrmanica yô que los premiérs tèmognâjos ècrits fant lor aparicion a la Renèssence. Dens un premiér temps, o ére quèstion d’un âbro drèciê u defôr u franc méten d’una vela ou d’un velâjo. Pendent lo XVIIIémo siècllo, los protèstants alemands transpôrtont l’âbro, sovent na simpla branche, dedens lors mènâjos por des cèlèbracions domèstiques. A l’origina pletout resèrvâye u grant-mondo, la tradicion du darbelin de Chalendes sè popularise et pués s’èpate dens la seconda mêtiêt du XIXémo siècllo a travèrs lo résto de l’Eropa et l’Amèrica de Bise.

Lo ples grôs darbelin de Chalendes alemand de l’an 2008 a Francfôrt-sus-lo-Men.

Houé, y at tot plen d’ornaments, coment des guirlandes, des bôles et des canes de bonbon. L’âbro est sovent ècllarâ, los ôtros côps per des chandèles et enqu’houé per des sistèmos èlèctricos. Un anjo ou ben n’ètêla pôt étre betâ u fin bèc de l’âbro por reprèsentar l’anjo Gabrièl ou ben l’ètêla de Bêt-Lèhem, simbolos de la Nativitât. Los articllos mejâblos coment lo biscômo, lo checolât et d’ôtres sucreries, étot populèros, sont agllètâs a les branches avouéc des rubans.

Notes et rèferences[changiér | changiér lo tèxto sôrsa]

Notes[changiér | changiér lo tèxto sôrsa]

Noms d’endrêt[changiér | changiér lo tèxto sôrsa]

Vocabulèro[changiér | changiér lo tèxto sôrsa]

Rèferences[changiér | changiér lo tèxto sôrsa]

  1. (fr) Rogiér Verèt, Dikchonéro Fransé - Savoyâ - Dictionnaire Français - Savoyard [PDF], 8éma èdicion reviua et ôgmentâye, 2021, pp. 2256-2257.