Chalendes

Noèl

Cél articllo est ècrit en arpetan supradialèctâl / ORB lârge.

Doux-três darbelins de Chalendes plantos devant lo téâtro de Chambèri de nuet.

Chalendes [tsa.ˈlɛ̃.de, tsa.ˈlɛ̃.də, tsa.ˈlã.de, θa.ˈlã.de, ʃa.ˈlã.də, θa.ˈlɛ̃.de] ou ben Noèl [no.ˈje, no.ˈe, nu.ˈje] est la féta crètièna que cèlèbre la Nativitât, cen vôt dére la cèlèbracion que recôrde la nèssence de Jèsus-Crist. La féta de Chalendes vint quârque temps aprés lo solstiço d’hivèrn borèâl que lyé est associyêe. La dècristianisacion fât que la féta de Chalendes est houé copâye de son fondament religiox dedens un mouél de payis ponantencs, mas s’y mantint coment féta tradicionâla.

Enstituâye lo 25 de dècembro u IV^émo siècllo et pués èpatâye per la cristianisacion progrèssiva de l’Eropa et du bachèt mèditèrranèen, cela féta de la Nativitât prend a châ pou la place de difèrentes fétes liyêes u solstiço d’hivèrn (féta gèrmanica de Youle, féta de Mitra, Saturnâles romènes, etc.). Presentâ lo Crist coment lo « Solely de justice » d’un novél temps, la sina nèssence ôvre l’an liturgico crètien pendent na mèssa de la Mié-nuet ritualisâye.

Na crêpe dedens l’égllése de la Mié-oût de Vôdrê u Jura.

Lo contio èvangèlico de la nèssence de Jèsus sèrvét de bâsa pendent de siècllos a na grôssa rechèce artistica (pintura, scultura, musica, litèratura) que renfôrce la difusion populèra de la crêpe u XIII^émo siècllo (enstituâye per sant Francês d’Assise), mas los fèrments d’ôtres tradicions liyêes u solstiço disparèssont pas complètament. Cen fât que lo vouargno gèrmano-nordico, segno d’una natura viventa mâlgrât l’hivèrn, est honorâ dês lo XVI^émo siècllo et pués gâgne mémo les églléses. Lo darbelin de Chalendes s’empôse coment simbolo du temps de les fétes de fin d’an paralèlament a la dècristianisacion de l’Eropa u temps modèrno.

La tradicion du pâre Chalendes, que sè mondialise u XX^émo siècllo, complète cel’èvolucion qu’at rapondu na dimension profâna a la féta crètièna, ples oriantâye vers los megnâts, les famelyes et de presents.