Vouiquipèdia:Lumiére dessus…/Sonjo conscient
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demécro 06 de julyèt 2022 tant qu’a la demenge 10 de julyèt 2022.
Un sonjo conscient ou ben sonjo lucido est un sonjo que lo cudiox at conscience d’étre aprés songiér. L’usâjo de l’adjèctif « lucido » coment sinonimo de « conscient » est étâ fêt rentrar en 1867 per l’ècriven, sinologo et onirologo francês Léon d’Hervey de Saint-Denys dedens son ôvra Los Sonjos et los moyens de los menar. Dens los ans 1980, lo scientifico Stephen LaBerge publèye des èxpèriences sus los sonjos conscients et prôve qu’o est possiblo dês l’ètat de sonjo d’adrèciér volontèrament un signâl desot la fôrma de mouvaments oculèros prèdètèrmenâs.
La plepârt des sonjos conscients sè pâssont pendent la fâsa de sono paradoxâl. Pôvont arrevar per hasârd ou ben rèsultar d’un aprentissâjo. Sè savêr aprés songiér semond u cudiox la possibilitât d’ègzèrciér un contrôlo dèlibèrâ pas solament sus ses accions mas étot sus lo contegnu du sonjo et sus son dèroulament.
La facultât de recognetre l’ètat de sonjo pendent son sono est mencionâye dedens los tèxtos boudistos u VIIIémo siècllo ap. J.-C. En Occident, lo sonjo conscient est étâ ètudiyê en laboratior du sono dês la fin des ans 1970.