Vouiquipèdia:Lumiére dessus…/Montagne
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demârs 14 de dècembro 2021 tant qu’u dessando 18 de dècembro 2021.
Na montagne est na fôrma topografica de relièf positif, qu’ègziste dessus la surface de planètes tèluriques, et qu’est dens un ensemblo — na chêna de montagnes — ou ben que fôrme un relièf tot solèt. El est caractèrisâye per son hôtior et, més g·ènèralament, per son hôtior a l’encant, vêr per sa penta. Portant ègziste gins de dèfenicion solèta de cen qu’est na montagne, tèrmo aparu entre-mié lo Xémo et lo XIIémo siècllo, et pués coègzistont tot plen de règ·ionalismos por dècrire les fôrmes de relièf. Pôt dèsignér a côp na bèca pentua et na simpla èlèvacion de tèrren, coment un molâr, atant que lo méten dedens son ensemblo. Les montagnes pregnont en èfèt de fôrmes brâvament difèrentes d’aprés los mècanismos que ménont a lor orog·enèse : dês les bârmes de mârges continentâles et los rifts en domêno èxtensif, tant qu’a les chênes de colision et pléssement, en passent per les fâses de subduccion que fât de volcans de tipo èxplosif en arcs ensulèros ou ben lo long de cordelyéres, sen oubliar lo volcanismo de pouent chôd de tipo èfusif ni les entrusions betâyes fôr per l’èrosion. Lo cllimat qu’enduront, avouéc des tempèratures en grôs més bâsses et des prècipitacions més importantes qu’en plana du fêt de l’hôtior, jouye asse-ben un rolo important dedens lor façonament. Avouéc l’isostasia, les montagnes cognessont de fenomènos de surrèccion et d’amincissement crustâl que ménont, prèst, a lor disparicion. Les més vielyes chênes de montagnes en Tèrra dâtont du Palèozoyico.