Vouiquipèdia:Lumiére dessus…/Mamifèro

Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo dessando 21 d’oût 2021 tant qu’u demécro 25 d’oût 2021.

Los mamifèros (Mammalia) fôrmont na cllâssa de bétyes vèrtèbrâyes qu’ant por més grôs trèt que los reprèsentents femèles alêtont lors jouenos avouéc na sècrècion cutanèo-gllandulèra spècialisâye apelâye lacél que vint quâsi tojorn de poces (mamillae), cen qu’at balyê lo nom de celes bétyes. Ils ant na tempèratura constanta et pués sont en g·ènèral cuvèrts de pêls. Lor cârro de rèparticion est planètèro, los mamifèros ant conquis un grôs mouél de les nices ècologiques de la macrofôna et pués réstont yon des taxons dominents dês l’Èocèno.

Los mamifèros sont los solèts reprèsentents d’ora des sinapsidos (na tropa que contint d’alyor lors ancians et pués los pèlicosôros, tropa parafilètica que comprend los ben cognus Dimetrodon et Edaphosaurus) et pués est rapondua avouéc lors tropa suèra los sôropsidos (rèptilos et uséls) dedens lo cllâdo des amniotos u méten de la supèr-cllâssa des tètrapodos. En 2018, la tropa contint 6 495 èspèces que, d’aprés los cllassements scientificos, sont distribuâyes en fllanc de 29 ôrdres, 153 famelyes et pués 1 200 genros.