Vouiquipèdia:Lumiére dessus…/Môris (payis)

Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo devendro 3 de novembro 2023 tant qu’u delon 6 de novembro 2023.

Môris [mo.ˈri] (Mauritius [mə.ˈɹɪ.ʃəs] ou ben [mɔː.ˈɹɪ.ʃəs] en angllès, Maurice [mɔ.ʁis] en francês, Moris [mo.ʁis] en crèolo môricien), en fôrma longe la rèpublica de Môris (the Republic of Mauritius en angllès, la république de Maurice en francês, Repiblik Moris en crèolo môricien), est un Ètat ensulèro de l’ocèan Endien a 868 km u levant de Madagascâr et 172 km a l’èste-nord-èste de La Reunion. Lo payis rapond dedens l’ila principâla de l’ila Môris, mas asse-ben l’ila Rodrigues a 560 km u levant de l’ila principâla. Les iles ples lé-outre d’Agalèga et de Sant-Brandon rentront arriér-més dens lo tèrritouèro nacionâl. Les iles Môris et Rodrigues sont dens l’ilâda de les Mascarègnes, avouéc l’ila de La Reunion, que constitue tant qu’a lyé un dèpartament d’outre-mar francês. La supèrficie totâla du payis est de 2 040 km². La capitâla et la ples granta vela est Pôrt-Louis.