Èrbena de les Ârpes
Lagopus muta • Lêche des Âlpes
|
Cél articllo est ècrit en arpetan supradialèctâl / ORB lârge. | 
|
.jpg)
Èrbena de les Ârpes suissa
(Lagopus muta helvetica)
| Règno | Animalia |
|---|---|
| Cllâssa | Aves |
| Ôrdre | Galliformes |
| Famelye | Phasianidae |
| Genro | Lagopus |
LC : Petiôta prèocupacion
L’èrbena de les Ârpes, en latin Lagopus muta subsp. helvetica Thienemann 1829, est un usél galiformo de la famelye des fasianidês, sot-famelye des tètraoninês, adaptâ ux climâts frêds et nêvox. Ceti usél mesere enveron 35 cm de longior et entre 55 et 60 cm d'empan. Son plomâjo est bardelâ de bron rossèt a gris bron, mas en hivèrn il vint tot blanc, avouéc les plomes du desot de la cova que réstont nêres. Los artelys sont emplomâs. Lo mâcllo pôrte na crèta roge qu'at un rolo important por sèduire les femèles et emprèssionar los ôtros mâcllos.
El est avouéc cognua coment la lêche des Âlpes en vâldoten.
L’èrbena de les Ârpes vit u tèrmeno supèrior des âbros. Ceti usél sèdentèro sè nurrét de borjons, de granes et de petiôts envèrtèbrâs. En mê ou jouin la femèla ôve, dens un nid sur lo sol, una diézêna d'ôfs bardelâs qu'el cove entre três a quatro senanes. Les èrbenes vivont en tropes de quârques famelyes.
L’èrbena de les Ârpes est yona des 23 sot-èspèces de Lagopus muta Montin 1776, èspèce qu'on trôve dens plusiors massifs montagnox et règions frêdes de l'hèmisféro bise. L'èspèce en gènèral est pas considèrâye coment menaciêe (LC u nivél mondiâl) mas quârques yones de ses variantes sont en dècllin. D'ense la sot-èspèce de les Ârpes est considèrâye coment menaciêe (fragila: VU) en Étalia et quâsi menaciêe (NT) en France et en Suisse.
