Fulyé

Cél articllo est ècrit en arpetan romand / ORB lârge.

Armoueria de Fulyé, avouéc des resims et un’émâge de l’égllése.

Fulyé (en francês : Fully ) est na comena suisse et arpetana dedens lo district de Martegné du quenton du Valês.

Les Follatères, montagne sus lo Rôno.

G·eografia

La comena sè trôve diens lo vâl du Rôno, a dréta du fllevo, et sot la montagne du Grant Châtèlârd.

Los velâjos de la granta comena sont : Fulyé, Bodon, Les Larzètes, Brançon, Bouétonna, Châtagnér, Chebo d’Avâl, Chebo d’Amont, N-Ôlo, Jor Bourlâye, Le Cârro, L’Ètrêt, Le Mayenc-Loton, Masembro, Le Pllagnuél, Rondonna, Sassê, Les Tassenêres, La Forél, La Fontanna et pués Vers l’Égllése.

Sus la montagne de Fulyé qu’est un endrêt de l’inârpa, sè trôvont doux lècs : A la riva du lèc d’amont de Fulyé qu’at étâ fât plés grant per un barâjo, est la sôrsa du biéd Bisse de la Vardette et comence un canâl de l’usine hidroèlèctrica de Fulyé. Lo Canâl de Fulyé est construit por drènar la plâna près Fulyé, après la corrèccion du Rôno u XIXièmo siècllo.

Les Follatères sont un endrêt du bec de la montagne a la bise de «coude du Rôno» et pués una resèrva naturèla du quenton du Valês.

Agricultura

Fulyé est na comena avouéc na granta produccion de vin et de châtegnes. La comena at una châtegnyé – un bouesc de châtegnérs – brâvament grant, avouéc plés de 1000 âbros.

L’égllése de Sent-Simforian.

Monuments

• L’égllése de Sent-Simforian, dèta la plés granta égglése du diocèso de Sion. El’est consècrâye lo 26 d’octobro 1936. Los sent patrons de l’égllése de Fulyé sont Ôrs, Simforian et Gotârd.
• L’usine hidroèlèctrica de Fulyé

Cultura et lengoua

• la sociètât de patouèsants « Li Brëjoyoeü » que gère la tradicion de l’Arpetan velêsan
• Groupo folclorico « Li Rondeniâ »
• La Féta de la châtegne, en octobro

Lims de defôr

• Seto Vouèbe de la comena : fully.ch/fr/