Ètnia

Una ètnia ou na benda ètnica est na populacion humèna èyent en comon una origina, una histouère, na mitologia, na cultura, na lengoua ou un dialècto, un môdo de via ; ben sovent plusiors de cetos èlèments a côp. L'apartenence a una ètnie ou ètnicitât est d'ense gllètâye a un patrimouèno culturèl comon, que ceti sêt la tradicion, les cotemes, lo rolo social, l'origina geografica, l'idèologia, la filosofia, la religion, la cuesena, la vetura, la musica… Revendicâye per la populacion regardâ lyé-méma, ceta apartenence est adonc una dèfinicion endigèna ; èmetua per des pèrsones èxtèrioses a ceta populacion, o est adonc na dèfinicion ègzogèna ; les doves dèfinicions pôvont sè recopar en partia ou a chavon (câs de nombrox « poplos endigènos »).

Ceta nocion d'ètnia fât pas rèfèrence a una apartenence politica comena. Ben des ètnies sè trôvont dens des ètats difèrents, quand ben els ocupont na surface unitèra. D'ense los touarègs sont divisâs entre l'Argèria, la Libia, lo Mali, lo Nigèr et la Môritania, et los samos (lapons) entre la Norvège, la Suède, la Finlande et la Russia. D'ôtres ètnies fôrmont des diasporâs (ègzemplo des roms).

Los conflits ètnicos vegnont de la difèrence de trètament entre les ètnies d'un mémo ètat, de la discriminacion que subéssont cèrtênes bendes ètniques comparâ avouéc la majoritât (en fêt l'ètnia dominanta), de la volontât de cèrtênes ètnies de sè rassemblar outre les frontiéres vêr de fondar un ètat (kurdos). A travèrs plusiors chârtes, lo Consèly de l’Eropa contribue a un mèlyor rèspèct des drêts ètnicos (quand ben ceti adjèctif sovent contèstâ ou trop "sensiblo" y est pas dirèctament citâ), cen vôt dére los drêts de consèrvar et fâre cognetre sa lengoua, sa cultura, sa religion, ses tradicions.... Lo dificilo travâly de l'ONU por lo ben des poplos endigènos vat dens lo mémo sens.