Ôs

Cél articllo est ècrit en arpetan supradialèctâl / ORB lârge.

L’esquelèta de l’homo avouéc doux-três ôs montrâs a pârt.

‘N ôs [o, u, uː] ou [us] est ‘n orgâno rêdo des Vèrtèbrâs, en grôs constituâ d’un tissu conèctif durci que diont étot ôs. Grâce a lor estructura, los ôs sont a côp legiérs, souplos et solidos ; celos des uséls contegnont d’êr et sont particuliérament legiérs.

L’ensemblo des ôs d’una bétye fôrme son esquelèta. Lor nombro et lor fôrma vareye brâvament d’aprés l’èspèce, la partia du côrp et mémo des côps l’âjo. Chiéz un nurreçon humen, dènombront tant qu’a 270 ôs ; chiéz na granta pèrsona, nen comptont 206.

Dens lo règno de les bétyes, d’ôtres èvolucions dedens la constitucion de l’esquelèta por l’ôs sont la coquelye et l’ègzosquelèta de quitina. Chiéz quârques vèrtèbrâs (notament les tortues), los ôs qu’érant per dedens sont vegnus èxtèrnos en sè verient en carapaça.

Ilustracion d’un ôs de la couesse humen teriêe d’Henry Gray’s Anatomy of the Human Body.

Aprés la môrt de la bétye, los ôs — por de veré lor partia minèrâla qu’est composâye surtot de fosfato de calcion apatitico — duront grant-temps, que pèrmèt sovent de recognetre l’èspèce tot pariér fossilisâye.

Notes et rèferences

Rèferences

— Principâles

1. (fr) Domenico Stich, Francoprovençal. Proposition d’une orthographe supra-dialectale standardisée [PDF], Tèsa de doctorat, Univèrsitât Paris-Sorbona, 2001, pp. 1232 et 1503.
2. (fr) Domenico Stich, Dictionnaire francoprovençal-français et français-francoprovençal, Tonon, Le Carré, 2003, pp. 106 et 334.
3. (fr) Alen Fâvro, Domenico Stich, Diccionèro de fata savoyârd-francês, francês-savoyârd, Fouènant, Yoran Embanner, 2005, pp. 187 et 409.
4. (fr) Èmê Chenâl et Rèmond Vôterin, Nouveau dictionnaire de patois valdôtain, 2^nda èdicion reviua et ôgmentâye, Quârt, Musumeci, 1997, pp. 1234 et 2035 [→ ous].
5. (fr) Frèderic Dubôf, Patois vaudois. Dictionnaire, èdicion reviua et complètâye, Ôron-la-Vela, Associacion vôdouèsa des amis du patouès, 2006, pp. 158 et 336 [→ oû].
6. (fr) Dictionnaire français-patois. Dikchenéro patê-franché, Fribôrg, Société cantonale des patoisans fribourgeois, 2013, pp. 264 et 803 [→ ou].
7. (fr) Rogiér Verèt, Dikchonéro Fransé - Savoyâ - Dictionnaire Français - Savoyard [PDF], 10^éma èdicion reviua et ôgmentâ, 2023, p. 2679 [→ o, ô, ou, oû, ous].