Jorn de l’an

Bon-an, An novél

Cél articllo est ècrit en arpetan supradialèctâl / ORB lârge.

Fuè d’artificio du jorn de l’an a Sydney en 2006.

Lo jorn de l’an [dzɔr də l‿ã] — en Romandia diont pletout lo bon-an [bɔ.ˈnã] — ou ben l’an novél [ã nɔ.ˈve] est lo premiér jorn de l’an. Per èxtension lo tèrmo dèsigne asse-ben les cèlèbracions de ceti premiér jorn de l’an.

Coment tota dâta anivèrsèra d’un calendriér balyê, lo jorn de l’an pôt étre na dâta bugeniére dens un ôtro calendriér que fonccione d’aprés n’ôtra logica. Per ègzemplo, lo jorn de l’an du calendriér chinouès (leni-solèro) est na dâta bugeniére dens lo calendriér grègorien (calendriér solèro).

Difèrence entre los calendriérs

Dens los payis tempèrâs

Quand ben que los « Jorns de l’an » tombont rârament a la méma dâta d’un calendriér a l’ôtro, remârcont na corrèlacion a l’encant entre-mié payis.

En èfèt, la « disparicion » de la vègètacion pendent l’hivèrn et sa « renèssence » u forél at nurri lo concèpto franc èpatâ de la « renèssence cicllica » de l’an. O est vêr pas ètonant que bien de « Jorns de l’an » seyont fétâs entre-mié lo solstiço d’hivèrn et l’èquinoxo de forél.

Dens los payis tropicâls

Portant o est pas du tot univèrsâl, notament dens los payis tropicâls, yô que lo cicllo de les sêsons est ben muens palpâblo.

Pôvont citar d’ense l’Ègipta antica, que, quand ben qu’emplèye un calendriér civilo solèro, féte l’an novél a l’arrevâ anuâla de l’égouâna du Nil. Diua cel’égouâna a les ploges que sè pâssont lé-outre dedens los hiôts platéls, sa dâta est tota tributèra de fenomènos du temps. Portant arreve gènèralament u mémo temps.