Vouiquipèdia:Lumiére dessus…/Mordavia
Cél « Lumiére dessus… » est étâ ou ben serat publeyê sus la pâge de reçua de l’encicllopèdia dês lo demécro 03 d’oût 2022 tant qu’a la demenge 07 d’oût 2022.
La Mordavia [mɔr.da.ˈvja], [mɔʀ.da.ˈvja] ou [mɔr.ˈdaː.vja] ou ben la Mordavie [mɔr.da.ˈvi], [mɔʀ.da.ˈvi], [mɔr.da.ˈvi.ə] ou [mɔr.da.ˈvi.jə] (Moldova [mol.ˈdo.va] en roumen), en fôrma longe la rèpublica de Mordavia (Republica Moldova en roumen, de yô que vint la varianta la rèpublica de Mordova), est un payis d’Eropa levantenche, encllavâ entre-mié la Roumania et l’Ucrèna, qu’engllobe de parties de les règions historiques de Bèssarabia et de Podolia miéjornâla (déta Transnistria). Sos cârros valonâs compregnont de bouescs, de tèrres curtivâyes, de zones humides et pués de vegnôblos. Sa capitâla est Chișinău.
La partia du tèrritouèro mordâvo d’ora que sè trôve sus la riva drêta du Dnièstre est étâye avouéc la principôtât de Mordavia (tributèro de l’Empiro otoman dês 1538), dês lo XIVémo siècllo tant qu’a 1812, dâta que lyé est étâye cèdâye a l’Empiro russo. Ceti nen at fêt son « govèrnament de Bèssarabia » et y at organisâ na colonisacion qu’at entrênâ l’enstalacion d’un mouél d’ôtres populacions que los Mordâvos, que portant sont réstâs majoritèros.
Los habitents s’apèlont los Mordâvos [lu mɔr.ˈdɑː.vo] et les Mordâves [le mɔr.ˈdɑː.və] ou [le mɔr.ˈdɑːv].