Utilisator:Saijhttam/Frédéric Chopin

Cél articllo est ècrit en arpetan supradialèctâl / ORB lârge.

Frèderic Francês Chopin (nèssu sot lo nom polonês : Fryderyk Franciszek Chopin, des côps ècrit en polonês Szopen ; a lo xixe sièclo, la grafie Szopę at étâ utilisâye en Pologne en concurrence avouéc la grafie Chopin) est un composior et pianisto virtuoso d'origina franco-polonêsa, nèssu en 1810 a Żelazowa Wola, sur lo tèrritouèro du ducât de Varsovie (ora en Pologne), et môrt en 1849 a Paris.

Aprés sa formacion a l'Hôta Ècoula de Musica de Varsovie et un dèbut de carriére en Pologne et a Viène, il quite la Pologne et a l'âjo de 21 ans, il s'enstale en France (il est venu de vers son pâre d'una famelye lorrèna venent de Marainville-sur-Madon), yô il dèvelope son enspiracion dens l'agitacion du mondo du piano parisien et dens la sovegnance de sa patrie môrtria. Il y rencontre George Sand, que serat sa compagne pendent nôf ans.

Saijhttam/Frédéric Chopin

Chopin en 1835 (pintura rèalisâye per sa galanta Maria Wodzińska).

Balyês cllâfs

Nèssence	1ér de mârs 1810 Żelazowa Wola, ducât de Varsovie, houé en Pologne
Môrt	17 d'octobro 1849 (a 39 ans) Paris, France
Activitât principâla	Composior, Profèssor de piano
Genro musicâl	Musica Romantica
Enstruments	Piano

Recognessu come yon des més grants composiors de musica de la pèrioda romantica, Frèdèric Chopen est asse yon des més cèlèbros pianistos du xixémo siècllo. Sa musica est adés houé yona des més jouyêes et demôre un passâjo endispensâblo a la comprèension du repèrtouèr du piano univèrsâl. Avouéc Franz Liszt, il est lo pâre de la tècnica modèrna de son enstrument et pêse sur tota una legnâ de composiors tâls que Gabriel Fauré, Claude Debussy, Maurice Ravel, Alexandre Scriabine, Sèrguèy Rachmaninov, ou Olivier Messiaen.

Identitât de Chopen

Frèdèric Chopen est nèssu lo 1ér de mârs 1810 a Żelazowa Wola en Pologne, a l'època sur lo tèrritouèro du ducât de Varsovie

Ducât de Lorrêna et Pologne a lo xviiie sièclo

En 1725, lo rê de France Louis XV èpose Marie Leszczynska, felye de Stanislas Leszczynski, èx-rê de Pologne de 1704 a 1709, que vit pourament en Alzace d'una pension que lui acôrde la France. A la sortia de la guèrra de Succèssion de Pologne, Stanislas vencu recêt los ducâts de Lorrêna et de Tavèrna que lo sôveren lègitimo èchanjo contre la Toscana devant que d'étre èlu emperor. Stanislas muert en 1766 ; o est solament a ceti moment que Lorrêna et Barrois vegnont francês, un pou avant qu'y nèssesse (1771) Nicolas Chopen, lo pâre de Frèdèric, que quite la France por la Pologne en 1787, coment chargiê d'èducacion dens una famelye nôbla.

Pologne de 1795 a 1830

En 1795, lo royômo de Pologne disparêt aprés un trêsiémo partâjo entre la Russie, la Prussa et l'Ôtriche.

Les guèrres de Napoléon pèrmètont en 1807 la reprêsa d'un Ètat polonês, lo ducât de Varsovie, dens que nêt Frèdèric en 1810. Mas la retrèta de Russie entrêne son ocupacion per los Russos en 1813 et sa disparicion en 1815, durent lo congrès de Viène : la Prussa controle l'Ouèst (grant-ducât de Posen) ; la Russie l'Èst (royômo du Congrès), et lo centro, avouéc Varsovie ; l'Ôtriche lo Sud (Tarnopol, Wieliczka) tandis que la rèpublica de Cracovie est somêsa ux três pouessiences de la Santa-Aliance.

Lo royômo du Congrès, asse apelâ « royômo de Pologne », at por sôveren l'emperor de Russie (la famelye Chopen est dês ora citoyèna de ceti royômo polonês sot contrôlo russo). Lo tsar Alèxandro Iiér lui balye una constitucion relativament libèrâla.

Ensurrèccion de novembro 1830 et ses consèquences

Lo royômo at vu avouéc una cèrtêna ôtonomie tant qu'a l'avènement (1825) du tsar Nicolas Iiér, tegnent de l'absolutismo. En novembro 1830, dèbute una ensurrèccion, qu'est fôrt ètofâye et entrêne a la fin de 1831 la misa u pâs de la Pologne russa (suprèssion de la constitucion, etc.).

De nombrox membros de la « armâ polonêsa » sè refugiyont a l'ètrangiér ; plusiors milyérs vant tant qu'en France, yô ils bènèficiyont d'una granta *sympathie12 et de secors oficièls. O est dens cetes circonstances tragiques que Frèdèric Chopen arrève en France, sen étre lui-mémo un rèfugiyê de l'ensurrèccion.

France et Eropa de 1831 a 1849

Chopen at vu en France èssencièlament pendent la monarchie de Juillet (1830-1848), et pués u comencement de la Seconda Rèpublica (1848-1851).

En Eropa, l'an 1848 est importanta, vu que des ensurrèccions sè tegnont dens de nombrox payis, en Alemagne, en Italie, en Hongrie, etc. Lo xixe sièclo est en èfèt marcâ dens tota l'Eropa per lo mouvement des nacionalitâts, spècialament en Pologne ; durent cetes anâs, Chopen vint una figura importanta du mouvement nacionâl polonês.

Nacionalitât de Chopen

Frèdèric Chopen est lo fily de Nicolas Chopen (1771-1844), nèssu a Marainville-sur-Madon (actuèl dèpartement des Vôges) et de la Polonêsa Tekla Justyna Chopen, nèssua Krzyżanowska (1782-1861). Venu en Pologne u sèrvicio de la comtèssa Skarbek, Nicolas èpose Tekla Justyna, parenta et dama d'honor de la comtèssa, en 1806.

En tenent compto du fêt qu'il at un pâre francês et una mâre polonêsa, la demanda de la « nacionalitât » (u sens d'apartenence de l'ètat) de Chopen at étâ l'objèt d'un dèbat des côps passionâ por dètèrmenar son statut oficièl. Mas la nacionalitât pôt asse étre envesagiêe de façon muens rigorosa, u sens d'identitât nacionâla (en fasent abstraccion de l'apartenence de l'ètat).

Identitât polonêsa

Tomba des parents de Frédéric Chopin u cemetiéro de Powązki a Varsovie

Chopen sè considèrâve, et ére considèrâ per sos contemporens, coment un Polonês. Sos compatriotos pârlont de lui coment du composior nacionâl polonês et sos amis font mémament : Balzac ècrit de Liszt et de Chopen : « L'Hongrouès est un dèmon, lo Polonês un ange », Liszt pârle du « artisto polonês ».

Manuscrit de la « Polonêsa hèrôica », op. 53 (1842).

Chopen at passâ los vengt premiéres anâs de sa via en Pologne. A son època, ceti èlèment est sufisent por lui assurar una identitât polonêsa : lo fêt d'avêr quitâ la Pologne a l'âjo de 20 ans et ples jamés y étre reveriê modifie pas ceta donâ primordiala. Alfred Cortot acôrde una granta importance u rolo èducatif de sa mâre : « l'enfluence ègzèrciêe per l'atmosfèra spècificament femenina du foyér de famelye, yô tant que vers la trègiéma anâ, il vivrat, d'aprés la formula sacrâye, dens los cotins de sa mâre et de ses suères ».

Pas-muens, ceta identitât est pas solament la consèquence d'una jouenèssa polonêsa et d'una convencion sociala. Nan solament « Chopen, en Pologne s'est construit polonês », mas lo musicien revendique sovent son apartenence a ceti payis.

Lo patriotismo dolorox de Chopen sè traduit dens sa musica, coment Liszt l'avêt ja remarcâ : « et les plentes de la Pologne emprontâvont a cetos accents je sé quinta poèsie mistèriosa, que por tôs celos que l'ant veretâblament sentua, sarêt étre comparâye a ren… ». Se ceta dimension d'ègzilâ du musicien sarmate, coment l'apèle Robert Schumann, sovent èvocâye per los biografos du passâ, est reprêsa per los musicologos de noutron temps, el est tot-un entèrprètâye de façon difèrenta. Por Eigeldinger, el est ora comprêsa coment una durâ tipicament slava, una sensibilitât culturèla. Por Liszt, Chopen « porrat étre rengiê u nombro des premiérs musiciens qu'èyont asse endividualisâ en lor lo sens poètico d'una nacion ».

La France, tèrra d'èlèccion

Portrèt de Frédéric Chopin, composior, Frésa d'un doblo portrèt avouéc George Sand, enchavonâ. Eugène Delacroix, vers 1838

L'identitât polonêsa de Chopen est jamés néyêe, et la relacion entre la France et Chopen est importanta. Mémament un nacionalisto coment Lucien Rebatet, que lui acôrde la nacionalitât francêsa, ècrit pués-cen : « Chopen lui-mémo sè serêt èlevâ contre ceta "encorporacion" (francêsa) ».

Un premiér èlèment est l'origina francêsa de son pâre, que, en vèrtu des disposicions du Code civilo, pèrmèt a Frédéric de bènèficiyér de la nacionalitât francêsa. La recognessence du statut de Français est atèstâye per un pâssapôrt èmetu lo 1ér d'oût 1835. Ceta solucion èvitâve a Chopen de demandar un pâssapôrt russo, payis èyent envayi la Pologne, et contornâve lo statut de rèfugiyê politico, qu'arêt dèfendu tot èspouèr de retôrn en Pologne. Pas-muens, les veretâbles motivacions de Chopen réstont encognues.

De l'ôtro lât, Chopen s'enstale a Paris en 1831 et vat y passar prés de la mêtiêt de sa via. La vela est, a ceta època, yona des capitâles culturèles du mondo. Il y nue sos amôrs et sos amitiêts les més importantes : Sand, Delacroix, Liszt ou Pleyel. Il y rencontre lo tot Paris artistico : Balzac, Berlioz, Thalberg, Kalkbrenner, Érard, Heine, et aristocratico. D'aprés Antoine Goléa, l'univèrs artistico et culturèl dens que lo composior at fêt l'èssencièl de son ôvra est la France mas l'atachement de Chopin a son payis natâl et l'enfluence de l'univèrs polonês réstâvont franc fôrt pendent tota la pèrioda francêsa.

Son enfluence est spècialament marcâye en France. Por lo musicologo Eigeldinger la somission fidèla de Debussy rapôrt u Mêtre polonês est èvidenta. Ceta enfluence, asse presenta chiéz Ravel ou Fauré, sè limite pas a la musica : « Per-lé lo musicien prèvêt lo principo "de Verlaine" : « Ren en ples chier que la chançon grise / Yô cen qu'est encèrtin u prècis sè rassemble ». Son emprèssionismo musical sè retrove en pintura : « por fâre un misa en lumiére resonant prod analogo a cèrtins èfèts de lumiére, a côp enniolâs et prècis, dens la pintura d'un Monet ».

Univèrsalitât de Chopen

Se la sensibilitât de Chopen est polonêsa et sè traduit per la reprêsa de mèlodies populères, sa lengoua musicala est « saventa », el participe de la « granta musica » por reprendre una èxprèssion de Delacroix. « Chopen at su, lo premiér, prétar una atencion ensorcelâye ux chants et verolèts populèros de sa Pologne natâla, sen jamés en citar complètament la muendra frâsa dens sa produccion. A un compatrioto por qu'il emprovisâve a Paris et que crèyêt entendre a novél una berceuse de son enfance, Chopin rabat : « Ceta chançon, te povês la cognetre… mas solament l'èsprit que l'anime : l'èsprit d'una mèlodie polonêsa ! ». Sa musica est venent d'una prèparacion saventa de l'acôrd et du contrepoint. El est avant tot aristocratico et est fôrt luen d'una fôrma populèra ou folclorica. En ceti sens, lo lengâjo musical de Chopin est més univèrsâl que polonês. Pas-muens, a pârt l'enfluence du folclore du tèrrouèr qu'il at su *universaliser coment baban ôtro, lo joueno Chopin at ben lèf subi cela du prince Michał Kleofas Ogiński (1765-1833), que les 26 polonêses cèlèbres dens tota l'Eropa de l'època sè distingâvont per l'èlègance, lo rafinement et la malincognie quâsi digno de Mozart, tipiques du prè-romantismo. A son tôrn, dens ses Polonêses, Chopin at su èxprimar l'èssence mémament de la « polonitât » tot en lui balyent un caractèro univèrsâl. Asse-més Cyprian Norwid (1821-1883), lo més grant poèto modèrno polonês, los comparâve a l'èpopê grèca.

Los pâres spirituèls de Chopin sont nombrox, mas lo musicologo Eigeldinger ne los trôve que dens lo patrimouèno univèrsâl et gins d'est polonês : « Mozart ére son Diô, Séb. Bach, yon des mêtres prèfèrâs recomandâs a tôs sos èlèvos ». Ceta univèrsalitât des origines et de la musica de Chopin est pas recognessua solament per Eigeldinger. Ceta analise est asse cela du poèto Heine que, dês 1837 rejuendêt cela fête mantegnent per la France et la Pologne : « Il est adonc ni Polonês, ni Français, ni Alemand ; il trayét una origina ben més hôta, il dèscend du payis de Mozart, de Raphaël, de Goethe : sa veré patrie est lo royômo enchantâ de la poèsie »

Documentèros

Frédéric Chopin ou l'ârma polonêsa, documentèra « A côsa de la musica » de François Reichenbach et Bernard Gavoty (Pèlicules du Prisme, France Règions 3, 1980) (durâye 1 h 52 menutes).

Chopin na Dworcu Centralnym [Chopin a la Gâra centrâla], documentèra de Krzysztof Zanussi rèalisâ en 1993 (durâye : 24 menutes).

Chopin, documentèro de Marie-Dominique Blanc Hermeline et Philippe Orreindy rèalisâ en 1998 (durâye : 26 menutes).

Chopin, documentèro d'Armand Isnard (Cat produccion) rèalisâ en 1999 (durâye : 52 menutes).

Qui at pouer de Frédéric Chopin ?, documentèro rèalisâ en 1999 (durâye : 51 menutes). Rèalisâ per Katarzyna Wieczynska-Chambenoit et fêt per Io produccion, Planèta, Focus producers avouéc la participacion du CNC et du ministèro de la Cultura et de la Comunicacion (DMDTS).

Chopin – The Women Behind The Music (Chopin - Les fènes dèrriér la musica), rèalisâ en 2010 per la BBC 4 (durâye : 90 menutes). Ceti documentèra TV èxpllore la via de Chopin, en particuliér ses encontres avouéc des chanterèsses que l'ant ensorcelâ a côsa de lor vouèx. Dens son comunicâ de prèssa, la BBC pârle de Jenny Lind coment « la granta sopranô suèdouèsa qu'at tant tochiê Chopin les dèrriéres anâs de sa via. « la granta sopranô suèdouèsa qu'at tant tochiê Chopin les dèrriéres anâs de sa via.  Dens la dèrriére scèna, James Rhodes (piano) et Natalya Romaniw (sopranô) presentont una chançon d'amôr en italien, sur un arrengement fêt per Jenny Lind de la mazurka de Chopin en lo major, op. 24, no 3 : L'amôr fidèlo muert jamés.

L'ârt de Chopin, documentèro de Gérald Caillat (produccion : Plesnar Pèlicules, Arte France, Telewizja Polska SA, 2010) (durâye : 52 menutes).