Botéron

Bombina variegata

Cél articllo est ècrit en arpetan supradialèctâl / ORB lârge.

Bombina variegata

Botéron

Cllassement d’aprés ASW
Règno	Animalia
Fôrche	Chordata
Sot-fôrche	Vertebrata
Cllâssa	Amphibia
Sot-cllâssa	Lissamphibia
Supèr-ôrdre	Salientia
Ôrdre	Anura
Famelye	Bombinatoridae
Genro	Bombina

Èspèce

Bombina variegata
(Linnaeus, 1758)

Statut de consèrvacion UECN

LC : Petiôta prèocupacion

Lo botéron (Bombina variegata) est n’èspèce d’amfibiens anuros de la famelye de les bombinatoridès.

Cél petiôt bot mesera tant qu'a enveron 5 cm de longior. Son èchena gris bron a vèrrues lui pèrmèt de sè camouflar avouéc èficacitât, mas tot lo desot est jôno bardelâ de nêr. Quand il est menaciê, lo botéron sè revire por montrar cetes colors que pôvont rapelar de crouyes sovegnances a sos atacants, viu que ceti bot pôt èmetre un liquido puant et irritant.

Lo botéron sè nurrét d'ensèctos, vèrms, petiôts crustacês et moluscos. En hivèrn il hibèrne. U forél ou u comencement du chôd-temps, aprés l'acoblament, la femèla ôve dens plusiors gouafes des petiôts chapelèts d'ôfs aguelyês ux plantes égouetiques. Los gorgolyons sôrtont u chavon de cinq jorns et aprés plusiors senanes de transformacions pregnont un aspèct d'adulto mas sè reproduisont solament aprés três ou quatro ans. U moment de la reproduccion ceti bot fât un chant particuliér ésiê a recognetre.

Lo botéron vit dens les gôlyes, les gouafes et les colisses des bouescs d'una granta partia de l'Eropa, en plana et en montagne. Ben que sa situacion sêt considèrâye coment pou enquiètanta (LC) u nivél eropèen, l'èspèce est emparâye dens plusiors payis et règions.
En France lo botéron est considèrâ coment menaciê (fragilo: VU) et més oncor en Suisse et en Étalie (en dangiér: EN). Lo problèmo vint de la rèduccion de son méten de via, qu'isole les populacions. Les meseres d'empâra sovent sevères ant dens des cârros empachiê ou retardâ la construccion de chemins, rotes et mémament ôtorotes, provocant l'ira de quârques politicos et amènagiors (ègzemplo de l'ôtorota du Chablès entre Machelyi et Tonon).