Litérateura valdôténa

De Vouiquipèdia, l’enciclopèdia abada.
Alar vers : navigacion, rechèrche
B down.svg Sit articllo l’è écrì eun patoué valdotèn / Grafiya B.R.E.L.. Lo drapó de la Val d’Outa


La litérateura valdôténa l'è la produchon litéréra eun francé é eun valdôtèn de la Val d’Oûta, di duché d'Oûta é di régno de Sardégne.

Origine[changiér | modifier le wikicode]

Lé premi euvradze retrouvou, dé teste é dé tsanson liteurgique eun lènve d'oué, son di XIe siécllo, é fan partìa di recoueill Diz et proverbes des saiges (1260), avouë dé tsanson di troubadour Thibault de Tsampagne (mor eun 1253).

Lé premi euvradze médiéval son lo Mystère de Saint-Bernard (XVe siécllo), la Chronique de la maison de Challant (1465) de Pierre Du Bois, secrétéro di conte Jacques de Challant, consul de la veulla d'Oûta é oteu d'euna verchon valdôténa de la Chastelaine du vergier ; é lé poéme de Boniface de Challant (1326-1426), écri dessu euna parey di tsati de Fénis pe lo mariadzo de sa feuille Bonne d'Uriage eun 1402, é alla perdu. L'at composou étò euna Généalogie des seigneurs de Challant, eun poéme de 400 ver de louandze à sa fameuille.

Lo premi euvradzo écri pe eun Valdôtèn é eumprimà eun Val d'Oûta l'a ëtò la Vie de Saint-Grat, publiou à Llyiòn eun 1575.

Lo XIX siécllo[changiér | modifier le wikicode]

Tanque i comènsemèn di XIX siécllo, la produchon litéréra locala l'è leumeutà-se à euna cantitou fran petchouda de chronologia, d'hagiografia, de sermon, d'euvradze de théologia é d'istouére, de généalogie. Duran lo XIX siécllo, lé-z-oteu local l'an subi l'ènfluance de Lamartine é de Victor Hugo, eun mèntenàn can mëmo eun caratére conservateur, soumi à l'Ènquisichon.

Lo premi groupo litéréro l'è formou-se grâce à la Feuille d'annonces d'Aoste, lo premi journal de la réjon, fondou eun 1841. Eun groupo de poéte, que l'ayé lo non de la Petite Pléiade valdôtaine, l'è formou-se adon : lé frére Alcide é Fernand Bochet (1802-1859 , 1804-1849), Augustin Vagneur (1796-1844), Joseph Alby (1814-1880), Eugène Pignet, Félix Orsières (1803-1870) é Léon-Clément Gérard (1810-1876). Leur style l'è i mentèn euntre lo romantisme de Lamartine, que caractérise surtôt Joseph Alby, é lé modéle francé de la poésia pastorala du XVIII siécllo que son restou lloin di romantisme dominàn. Alby l'ie lo consul francé eun Sicile, à Porto Empedocle, é l'a publiou euna traduchon de l'Enfer de la Divine Comédie de Dante deun la Gazette de Nice eun 1858.

Lo premi euvradzo eun prose eun francoprovensal valdôtèn son le chui verchon diférènte de la Parabole du Fils Prodigue, recoueulli pe lo dialectologue Bernardin Biondelli eun 1841, é publiou pe Charles Saviolini eun 1913.

Eun 1855 l'Académie Saint-Anselme l'è fondaye, euna asociachon d'érudi, écreuvein é istorièn que l'ayan pe but la défensa de la lènva francésa é dé tradichon locale aprë l'anechon i nouo Régno d'Italie, èntiéremèn italophone, yeui la Val d'Oûta l'ie euna minorità linguisteucca. Ço l'è lo comensemèn de la litérateura arpitana, é lé protagoniste son ëtò l'abbé Jean-Baptiste Cerlogne, oteu étò di premi Dichonéro di patoué valdôtèn (1907) é de Le patois valdôtain, son origine littéraire et sa graphie (1909), é Eugénie Martinet.

Avoué l'anechon i Régno d'Italie, l'ativitou litérére valdôténa eun francé, modesta mé prometanta, l'a subi eun contrecoup, Aoûta é Pari sayan todzor pi llouèn l'euna de l'âtra. Lo francé l'ie todzor deun lo qeur di Valdôtèn comme lènva litéréra é écrita, tandi que lo francoprovensal l'ie la lènva de l'usadzo cotidièn, que l'abbé Cerlogne l'at jamé tsertsa d'élevé à lènva nachonala. L'euvradze eun patoué son arreuvou aprë, avoué dé-z-oteu commo Marius Thomasset (1876-1959), avouë Mes premier essais - Proses et poésies en dialecte valdôtain (1910) é Pages volantes - Poésies et proses en dialect valdôtain (1911), l'abbé Joseph-Marie Henry (1870-1947), avouë sa piéce théâtrala Le femalle a lavé bouiya (= Les femmes au lavoir) de 1933, Désiré Lucat (1853-1930), avouë Le soldà é le fen de 1915. L'oteu lo pi eumpourtan de l'époque l'è ëtò lo poéte symboliste Léon-Marius Manzetti (1903-1936), qui l'a avu son momèn de gllouére à Pari.

La litérateura arpitana[changiér | modifier le wikicode]

Eun 1955, pe lo premi cou deun l'istouéra valdôténa, chui poéte francoprovensal valdôtèn, Anaïs Ronc-Désaymonet, Eugénie Martinet, Césarine Binel, Marius Thomasset, Amédée Berthod é René Willien, l'an réuni-se i Salon ducal de l'Hôtel de ville à Aoûta pe euna lèiteura publeucca de poéme. Eun 1963, l'an organisou la premìe édichon di concour Abbé Cerlogne de poésia eun patoué, é eun 1958 l'è fondou lo Charaban, euna coumpagnìa permanènta de théâtro populéro eun patoué. Bien dé poéme l'an ëtò publiou deun la revu La Grolla, grâce à René Willien, é deun l'Esprit nomade d'Italo Cossard, fondaye eun 1948, é paài deun Le Flambeau (1949), périodique eun francé di Comité des traditions valdôtaines.

I fa souligné lo travaill d'Anaïs Ronc-Désaymonet (1890-1955) avouë Poésie campagnarde de Tanta Neïsse (1951), de Césarine Binel (1897-1956) avouë Poésie patoise (1967), de la prolifique Armandine Jérusel (1904-1991) avouë Rouse batarde (1964), Mondo blan (1976), L'Ouva et lo ven (1983) é Poussa de solei (1991), de René Willien (1916-1979), lo promoteu di théâtro populéro eun patoué, éditeu de l'antologia Noutro dzen patoué (1963) é fondateu di Centre d'études francoprovençales de Sèn-Nicolas eun 1967, que pourta eunco oui son non.

D'âtre non à rapelé son sisse d'André Ferré, Victor Martin, Marco Gal, Pierre Vietti é Raymond Vautherin, oteu avouë Aimé Chenal di Nouveau dictionnaire de patois valdôtain (1982).

Liyèn ènterne[changiér | modifier le wikicode]

Liyèn esterne[changiér | modifier le wikicode]